rokkið blessi heimilið » fjölskyldan

Sólóflug

Jón Óskar — Sun, 10 Oct 2010 16:48:14 +0000

Ásdís Karen hjólaði í fyrsta skipti í dag án hjálpardekkja. Hún var loksins tilbúin

Drekatamningar

Jón Óskar — Tue, 06 Apr 2010 07:52:22 +0000

Fjölskyldan slúttaði páskunum þetta árið með því að skella sér í bíó. Fyrir valinu varð Að Temja Drekann Sinn (How To Train Your Dragon), skemmtileg mynd sem kom okkur öllum á óvart. Stelpurnar vildu ólmar sjá When In Rome en þar sem hún var ekki sýnd á Selfossi og við nenntum ekki til Reykjavíkur varð dreka myndin fyrir valinu – enda sá ekkert okkar eftir því.

Ef til vill var það hóflegum væntingum að þakka en okkur fannst myndin frábær; góð blanda af húmor, spennu og dramatík. Það kom okkur reyndar á óvart að salurinn var nánast tómur en við kvörtuðum svo sem ekki, gátum valið úr góðum sætum. Eini gallinn við sal #1 á Selfossi er að það er einhver fátans skítalykt þar inni – einhver hrærigrautur af ódaun þar sem mygla er hvað mest áberandi. Það hafði lukkulega engin áhrif á glápið.

Ásdís Karen veik

Jón Óskar — Fri, 26 Mar 2010 12:59:14 +0000

Ásdís Karen og Gígja léku sér saman eftir leikskóla á miðvikudaginn. Þær voru að horfa á eitthvað skrípóið þegar við tókum eftir því að Ásdís Karen lá eins og klessa í sófanum og tók ekki þátt í fimleikaæfingunum með Gígju sem stundum eru gerðar samhliða skrípóglápi. Óformlegt hitatékk á enni með samanburði við aðra fjölskyldumeðlimi staðfesti að hún væri komin með hita. Hún var afskaplega slöpp í gær, með ríflega 39°c hita en virðist vera eitthvað skárri núna – að minnsta kosti það sem af er degi.

Prófaði í gær heimagerða fajitas kryddblöndu. Marineraði kjúkling í blöndunni í um það bil klukkutíma, svissaði papriku og rauðlauk á pönnu og hitaði tortilla kökur í grillinu. Handsdown besta fajitas sem hér hefur verið borið á borð auk þess sem ég mun sennilega aldrei aftur kaupa tilbúnar kryddblöndur til þess konar matreiðslu.

Bráðsmitandi pest!

Jón Óskar — Tue, 09 Mar 2010 22:10:12 +0000

Eva Þórey kom til mín skömmu eftir þær fóru uppí rúm með tárin í augunum; kvartaði um sáran verk í maganum. Ég fylgdi henni aftur í rúmið, tók fötu meðferðis og stillti upp við hliðina á rúminu hennar. Um leið og Ásdís Karen sá umstangið fékk hún “vont” í magann. Agalega, agalega vont í magann.

Ég sótti því aðra fötu og setti við rúmið hennar, bauð þeim báðum góða nótt og sagðist nú vona að þær væru ekki að fá ælupest. Þær voru sofnaðar sléttum þremur mínútum seinna.

Helena þurfti nefnilega að fara á fund í kvöld, sjáið til. Mömmusöknuður getur verið ansi svæsinn hjá litum litlum stelpum

Hún á afmæli í dag

Jón Óskar — Mon, 08 Mar 2010 07:59:25 +0000

Helena á afmæli í dag og næstu 8 mánuði verðum við jafngömul, svo verð ég aftur ári eldri

Ég keypti afmælisgjöfina á fimmtudaginn í síðustu viku, massa flotta Didriksons úlpu, og gat ekki beðið til dagsins í dag með að afhenda hana; svona er bráðlætið!

Í gær vorum við með kruðerí með kaffinu og fengum góða gesti heim. Kvöldinu var svo eytt í kvikmyndagláp.

Við keyptum lambalæri með fínum afslætti í Bónus á laugardaginn sem verður eldað í tilefni dagsins – ég hlakka afskaplega mikið til kvöldsins

Fékk sér göt í eyrun – myndir

Jón Óskar — Mon, 08 Mar 2010 07:29:33 +0000

Ásdís Karen (4), sleppti fram af sér beislinu á laugardaginn var og lét gata á sér eyrun. Í samtali við vefritara sagðist Ásdís Karen hafa verið í “flippuðu stuði” og ákvað að kýla á þetta. “Pabbi bauð mér upp á þetta svo þetta var eiginlega no-brainer”, bætti Ásdís kampakát við.

Bæði eyrun voru götuð samtímis og það var ekki fyrr en Ásdís fékk grænt ljós frá mömmu sinni að hún veitti sársaukanum útrás með tárum. Hún stóð sig samt eins og hetja.

Búsetuafmæli

Jón Óskar — Thu, 04 Mar 2010 20:11:59 +0000

Í dag eru fimm ár síðan við fluttum úr ys höfuðborgarinnar í sveitasæluna hér í Ölvezinu. Við ætluðum upphaflega að flytja þann 5., sem var laugardagur, en fengum óvænt góðan flutningabíl til afnota á föstudeginum. Mig minnir það hafi tekið um 3 tíma að sópa út úr Reykási 41 inn í bílinn, skottast yfir Þrengslin og henda úr bílnum inn í bílskúrinn hér í Ölvezborg.

Hér hefur okkur liðið vel allan tímann og viljum hvergi annnars staðar vera. Í bili að minnsta kosti…

Fimleikamót #2

Jón Óskar — Wed, 03 Mar 2010 19:22:43 +0000

Eva Þórey keppti á sínu öðru fimleikamóti á einum mánuði. Þetta var byrjendamót sem íþróttafélagið hér í Ölvezinu, Þór, hélt.

Ekki fékk hennar hópur verðlaun í þetta sinn en ég er iðinn við að segja henni að sé hún dugleg að æfa komi árangurinn í ljós; fyrr en síðar.

Umfram allt hafði hún virkilega gaman að þessu.

Stelpurnar veikar

Jón Óskar — Wed, 03 Feb 2010 07:37:20 +0000

Eva Þórey var með magakveisu og Ásdís Karen fékk einhverja flensupest aðfararnótt þriðjudagsins. Eva Þórey var búin að ná sér strax í gær og fór á fimleikaæfingu seinnipartinn í gær, fer því í skólann í dag. Ásdís Karen var hress í gær og mældist ekki með hita í gærkveldi en það var vesen á henni í nótt og ég fann að hún var með hita.

Ég var heima með þeim í gær og sinnti vinnu á VPN-inu. Helena hjúkrar unganum í dag.

Fastir liðir eins og venjulega

Jón Óskar — Tue, 05 Jan 2010 08:23:40 +0000

Æ hvað það verður gott að fá daglegt líf í fastar skorður. Jólafríið var ljómandi fínt og allt það en mér þykir magnað hvernig regluleysið fer með börnin. Ásdís Karen var orðin frekar pirruð og skeytti skapi sínu á hverju og hverjum sem var fyrir henni. Lítil stelpa með stórt skap.

Skólinn byrjaði núna í morgun hjá Evu Þórey, Ásdís Karen fór í leikskólann í gær – enda sofnaði hún á undir fimm mínútum í gærkveldi. Býst við að svipað verði uppi á tengingnum í kvöld hjá þeim báðum.