Ásdís Karen hermir eftir eldri systur sinni í einu og öllu – eins og litlu systkina er von og vísa.
Ég spurði systurnar einhverrar spurningar í vikunni, þar sem viðbúið svar ætti að vera nei.
Eva Þórey svaraði: “Leyf mér að hugsa… öööö nei!”.
Ásdís Karen apaði eftir systur sinni en gaf sér þó tíma til að hugsa svarið:
“Leyf mér að hugsa….
…
…
…
…
…
…
…
…
öööö nei!”
Síðastliðinn þriðjudag stóð Helena í bakstri, bakaði meðal annars gómsæta lakkrístoppa. Í toppana fór lakkrískurl frá Góu en þegar Helena mældi í uppskriftina kom í ljós að í pokanum sem átti að innihalda 200 grömm voru einungis 150 grömm.
Hún samdi póst þar sem hún lýsti óförum sínum við baksturinn og sendi á sælgætisgerðina Góu. Póstinum var svarað af starfsmanni Góu sem baðst afsökunar og sagði frá því að mistök hefðu orðið í framleiðsluferlinu. Starfsmaðurinn bað í leiðinni um heimilsfang Helenu svo unnt væri að bæta fyrir mistökin.
Í morgun kom kassi í póstinum sem hýsti konfektkassa, hraunbita, hlaupbangsa, lakkrískurl, lakkrískonfekt og rúsínur.
Vel gert.
Góa hefði getað sent okkur 200 gramma poka af lakkrískurli og látið þar við sitja. Í staðinn fóru þau fram úr væntingum og sendu kassa drekkhlaðinn góðgæti.
Góa fær því verðskuldað hrós.
Mér var að hlotnast 8 16 24 stk invite á google wave.
Ef þú hefur áhuga, settu þá nafn og gmail netfang í athugasemd, og ég skal alvarlega íhuga að senda þér invite.
Ekki setja att merkið, @, ef þú vilt komast hjá ruslpósti. Settu “nafn hjá gmail punktur com”.
Við hituðum grænmetisbuff og kjúklinganagga í kveldmatinn í gærkveldi. Stelpurnar heimtuðu að fá sér sjálfar á diskinn úr eldfasta mótinu en það fór ekki betur en svo að þær brenndu sig á funheitu forminu. Báðar.
Ásdís Karen brenndi sig handleggnum þegar hún stakk gafflinum í buff. Eva Þórey, þrátt fyrir ítrekaðar aðvaranir, þurfti að pota puttanum í formið og finna hvort það væri heitt. Hún komst að því með nístandi sársauka að svo var.
Mamma átti enn Burn-Free krem frá Mánadögunum, töfrakrem sem kælir og deyfir brunasár. Ég fékk því skammt til að bera á klaufabárðana.
Þær sofnuðu báðar með kælingu á sárunum.
Þegar skipt er um peru í halógenljósi þarf ég að:
Skipti nefnilega um peru í ljósi inn á baði um helgina og var allt að því löglega blindur í nokkrar mínútur á eftir…
Mikið afskaplega finnst mér Víking jólabjórinn góður.
Helena er á jólaglöggi með leikskólanum og stelpurnar sofnaðar. Þetta var spurning um norska spennumynd á RÚV eða tölvuna og fágaða ölsmökkun.
Feginn að ég valdi rétt 
)
Pítsan í kvöld sló met. Án efa sú besta síðan ég hóf tilraunastarfsemi í eldhúsinu.
Tveir veigamiklir hlutir breyttust í ferlinu:
Ég var búinn að vera lengi á leiðinni að kaupa pítsustein en rakst á það á google um daginn að óglerjuð flís gæti gegnt þessu hlutverki með prýði. Kemur sér geypilega vel þar sem verðkannanir sýndu að eiginlegur pítsusteinn er að kosta á bilinu sex til átta þúsund krónur.
Mæli eindregið með þessari eldunaraðferð.
Þetta er ekki hefðbundin píta þar sem brauðinu er skellt í brauðristina og gúmmelaðinu skellt í vasann. Þetta er píta fyrir lengra komna.
Taktu pítubrauðin tímanlega úr frystinum (séu þau þar yfir höfuð) settu í poka og leyfðu þeim að þiðna í rólegheitum. Stilltu ofninn á 180°c. Sippaðu hakki eða kjúkling á pönnu og steiktu þar til tilbúið. Ég nota yfirleitt hakk, krydda með Season-All og þegar hakkið er næstum steikt strái ég pizzakryddi yfir, puðra pizzasósu yfir og blanda saman. Á meðan hakkið/kjúllinn er að eldast á snarkheitri pönnunni er gráupplagt að láta eftir sér að smjörsteikja nokkra sveppi – niðursneidda. Alger killer.
Þegar kjetið er klárt eru pítubrauðin skorin nánast í tvennt, þversum nóta bene, og lögð á álpappírsklædda ofnplötu. Kjetinu skellt á annan helminginn, rifnum osti á hinn og smjörsteiktu sveppunum ofan á hakkið. Á þessu stigi mega ævintýragjarnir bæta meira ofan á; feta osti, ferskum mozzarella eða hverju því sem hugurinn (eða maginn) girnist. Hugrakkir fullkomna verkið með jalapeno sneiðum.
Nú er ofnplatan sett í heitan ofninn og látin dúsa þar í um það bil tíu mínútur, eða þar til osturinn er hæfilega bráðinn. Á meðan dútlaru við að skera niður uppáhalds grænmetið þitt.
Út kemur ofnplatan, pítur færðar á matardisk og grænmetinu dreift yfir af lyst. Púnkturinn yfir i-ið er svo slumma af pítusósu eftir smekk. Helmingnum sem er ekki með hakkinu skellt á og þrýst blítt en ákveðið ofan á. Borðist með hnífapörum, mæli með grillhníf þar sem brauðin verða stökk í ofninum.
Gjörsvovel.
Eva Þórey vakti okkur með látum í nótt með æluna í hálsinum. Ég rétt náði að henda henni útúr rúminu áður en fyrsta gusan kom. Gusa númer tvö fór sem betur fer í baðkarið.
Hún gubbaði tvisvar sinnum eftir þetta og er gubbupestin því sannreynd, ég var að vona að fyrsta tilfellið hefði bara verið það eina en því var ekki að fagna. Ekkert okkar var tilbúið að vakna þegar klukkan hringdi í morgun.
Það er svolítið fyndið að þegar Ásdís Karen vaknar svona upp á næturnar fær hún alveg makalausa munnræpu – þarf að ræða allt milli himins og jarðar )
En varið ykkur, þetta ógeð er víst eitthvað að ganga.
Hér er kennt hvernig best er að bera sig að í dýfum á knattspyrnuvellinum, með vísan í atvinnumenn í “dýfingum”.
Nýlegar athugasemdir