Gerðum okkur glaðan dag í dumbungnum og fórum að sjá Ísöld 3 í Sambíóum Álfabakka ásamt Gesti, Dai, Gillí og Bergi Ómari. Ég var einstaklega hygginn í þetta skiptið og keypti miða fyrir hersinguna á midi.is áður en við lögðum í’ann. Það átti eftir að koma sér vel því lengdin á röðinni í miðasöluna var slík að við hefðum ekki komist að í tæka tíð.
Völdum 3D sýninguna en ég varð fyrir vonbrigðum; það var einungis eitt atriði sem mér fannst njóta sín til fulls í þrívíddinni sem mér þykir afar slappt.
Hléið var heldur langt og Ásdís Karen og Bergur Ómar voru farin að ókyrrast síðasta kortérið en myndin sem slík var ágætis skemmtun. Niðurstaðan er sú að upplifunin var ekkert til að hrópa húrra yfir – myndin hefði sennilega skilað nákvæmlega því sama hefðum við horft á hana á DVD.
Við gerðum óformlega könnun á ferðavögnum á leiðinni heim: töldum 28 fellihýsi, 18 tjaldvagna og 9 hjólhýsi frá Álfabakkanum. Vinsælustu vagnarnir hljóta því að vera fellihýsin.
Nýlegar athugasemdir