rokkið blessi heimilið

Lögðum af stað í samfloti við mömmu og pabba + Gest og Dai um ellefuleytið á fimmtudagsmorgni. Stoppuðum þrisvar á leiðinni; Bónus í Borgarnesi, pissustopp í Búðardal og fyrir neðan Þorskafjarðarheiði. Vorum komin á tjaldsvæðið um fimmleytið.

Sundlaugin á svæðinu gekk í gegnum lagfæringar í vor/sumar og opnaði aftur fyrir um mánuði síðan. Laugin er hituð með heitu uppsprettuvatni og náttúruleg, skilst það sé engum klór bætt við vatnið enda þrífst í henni grænn og háll/sleipur gróður. Afskaplega notaleg og góð sundlaug.

Eiginlegt ættarmótið var sett á laugardeginum með skrúðgöngu í kringum tjaldsvæðið. Krakkarnir fengu sápukúlur og sælgæti auk þess að vera boðið upp á andlitsmálningu. Sameiginlegur kvöldmatur og skemmtiatriði á eftir var hýst í sal þar sem hitinn var nánast óbærilegur – bæði skein sólin beint inn um gluggana og salurinn fullur af fólki. Þó aðalfjörið væri á laugardagskveldinu drakk ég bjórinn hóflega, ég nennti ekki að keyra heim á sunnudegi í þynnku sem er gjörn á að koma daginn eftir.

Skyldustopp á Hótel Bjarkalundi var tekið á heimleið auk þess sem við stoppuðum að að borða í Búðardal. Samkaups-sjoppan var troðin út að dyrum svo við ákváðum að leita annað; fundum Villa Pizza steinsnar frá. Þaðan fórum við svöng út eftir við höfðum setið í um það bil tíu mínútur – kortér án þess svo mikið sem að vera boðið upp á matseðil. Svona skítastaðir geta átt sig og fá ekki krónu úr mínum vasa.

Eftir helgina stendur fínt ættarmót, veðrið var svo sem með ágætum nema það blés kannski heldur meira en góðu hófi gegnir. Næst á dagskrá er ættarmót Helenu megin, í Árnesi.

Frændsystkin eftir andlitsmálningu

Tvær nætur við Úlfljótsvatn, fjórar nætur í Hrífunesi og við Hellishóla, þrjár nætur á Reykjanesi. Þrjár útilegur, níu nætur komnar þetta sumarið.

Tvær nætur bætast við næstu helgi og svo er verslunarmannahelgin eftir – þetta sumar slær met.

Fórum í kaupstað í dag að útrétta fyrir ættarmótið um helgina. Sótti myndavélina úr viðgerð í Fótóval tvisvar. Í fyrra skiptið kom í ljós að vélin var eins og fyrir viðgerð, spegillinn festist uppi. Fór aftur seinnipartinn og þá var sú litla í rífandi stuði.

Vorum að vesenast í Kópavoginum og komum við í Muffin Bakery í Hamraborginni. Staður sem ég mæli hiklaust með; hands-down bestu möffins sem ég hef nokkurn tímann smakkað. Dílissjös.

Er búinn að vera græja fellihýsið líka. Sótti fótinn undan því úr viðgerð í gær en sökum leti fór hann ekki undir fyrr en í kvöld. Þurfti aðeins að hafa fyrir því en með dyggri aðstoð góðra manna tókst aðgerðin með ágætum.

Stefnum á að leggja af stað um tíu leytið í fyrramálið á vestfirðina. Með stoppi í Bónus í Borgarnesi og ef til vill einu í viðbót ættu þetta að vera á milli fjórir og fimm tímar. Tökum með einhverjar myndir, leiki og músík fyrir stelpurnar að gleyma sér yfir á leiðinni. Þá ætti þetta að vera nokkuð ljúft.

Eftir daginn í dag erum við öll komin í sumarfrí. Næs.

Ætlum í útilegu í fyrramálið, ekki ákveðið hvert en það verður að öllum líkindum á suðurlandinu – ef til vill austar. Mig langar svolítið að prófa Kleifarmörk við Kirkjubæjarklaustur, jafnvel Skaftafell.

Mikið afskaplega verður gott að komast í frí. Jafnvel næs.

Það er alveg merkilegt hvað maður getur þróað með sér undarlega kæki og sérvitra siði.

• Ef hægri hendin blotnar, verð ég að bleyta þá vinstri líka (og vitanlega öfugt).
• Ég byrja alltaf á að borða brauð á þeim enda sem snýr upp í forminu sem það er bakað í.
• Ég forðast það í lengstu lög að hafa hljóðstyrk í bílútvarpinu á 13. Lendi ég óvart á 13 tjúna ég á 12 eða 14. (Ómar Páll bróðir tekur þetta skrefinu lengra og hefur hljóðstyrkinn alltaf á sléttri tölu – ALDREI oddatölu).