rokkið blessi heimilið

Hjónaleysin brugðu undir sig betri fætinum og mættu á Jónsmessuhátíð á Eyrarbakka á laugardagskvöld. Nenntum ekki á brennuna vegna veðurs en mættum galvösk á dansiball á Rauða Húsinu þar sem Grétar Ingi og hljómsveit, Svartasker, spiluðu fyrir dansi. Þarna var margt um manninn og mikið afskaplega var gaman að hitta gamla vini sem við höfum ekki hitt í langan tíma. Stelpurnar voru í góðu yfirlæti á meðan og gistu hjá ömmu og afa á Setberginu.

Rúntuðum til Keflavíkur í gær þar sem Hjörleifur bauð til veislu í tilefni afmælis síns. Eva Þórey varð eftir og dvelur í Keflavíkinni hjá afa og ömmu fram á miðvikudag. Vorum seint á ferðinni í gær þannig við horfðum á úrslitaleik EM hjá Heiðu og Agli í Garðabænum. Mikið afskaplega var ljúft að sjá okkar mann, Fernando Torres, tryggja spánverjum EM titilinn.

Til hamingju með afmælið Hjörleifur; gamli svingur ;o)

Laugardagurinn var frábær dagur. Dagskráin byrjaði kl. 13:00 með skemmtisiglingu og fjölskyldan skellti sér í róður með Friðrik Sigurðssyni, ásamt Gesti og fjölskyldu og fleirum. Tekinn var góður hringur ásamt þeim þremur skipum sem fóru líka; Jóni á Hofi, Ársæl og Arnari. Stelpurnar skemmtu sér konunglega og Ásdís Karen skríkti af ánægju á bakaleiðinni þegar siglt var á móti straumi og báturinn dansaði á öldunum. Útgerðin skaffaði kók og prins svo enginn yrði svangur á stíminu.

Okkur fannst undarlegt þegar Arnar, sá fremsti í röðinni, tók skyndilega U-beygju þegar hann nálgaðist hafnarmynnið. Um leið sáum hvar Jón á Hofi rak vélarvana – og var kominn ansi nálægt landi fannst okkur. Það fór þó allt vel, vélin var ræst og skipið sveigði tignarlega frá landi og á eftir okkur að bryggju. Í ljós kom að það átti að leyfa einhverjum krakkanum að ýta á lúðurinn en sá fór takkavillt og ýtti á neyðarstoppið fyrir vélina!

Nutum veðurblíðunnar það sem eftir var dags, þó það hefði verið aðeins of hvasst. Fórum í “nýjan” Fróða og fengum veitingar, horfðum á ökuleikni glæpagengisins á treiler-trukkum, kappróður, reiptog og koddaslag. Allt sem tilheyrir deginum.

Grilluðum saman á Setberginu og lukum deginum með því að fara á tónleika á bryggjunni, þar sem Grétar Ingi spilaði með hljómsveit sinni Svartasker.

Helginni var lokað með bæjarferð á sunnudag þar sem stelpurnar voru skóaðar upp, merkilegt hvað þær slíta þeim fljótt.

Við tókum yfir 400 myndir á laugardeginum, af hinu og þessu, og rjóminn af því verður væntanlega settur í albúmið von bráðar.

Bætt við, 4. júní kl. 18:00:
Mynd af gullfallegum mæðgum í skemmtisiglingu