rokkið blessi heimilið

Ég er alveg eyðilagður að hafa misst af skjálftanum í gær. Var nýfarinn úr vinnunni og var að keyra miklubrautina við hlíðarnar, svona um það bil, þegar skjálftinn reið yfir. Fann ekkert fyrir þessu en fann fyrir nokkrum eftirskjálftum seinnipartinn og í gærkveldi. Fann tvo pínu kippi þegar ég snæddi seríosið í morgun.

Helena var úti á snúrum og stelpurnar inni í bílskúr þegar hremmingarnar dundu yfir. Vesalings Ásdís Karen var dauðhrædd - hélt þetta væri einhver maður með allan þennan hávaða og var illa huggandi í langan tíma á eftir. Hræðslan kom ekki yfir Evu Þórey fyrr en seinna og þurfti mikið að leita í skjól og öryggi foreldra sinna.

Ingvi Hrafn Jónsson var í beinni útsendingu á sjónvarpsstöðinni ÍNN þegar suðurlandsskjálftinn reið yfir. Sá þetta á vísir.is en set myndbandið skömmustulaust hér inn þar sem það er hýst á YouTube. 

Við iðum af kláða til að liggja úti í fellihýsinu okkar.

Sjómannadagshelgin framundan þannig ekki verður farið þá helgina, vonum að veðrið verði hagstætt þá næstu. Það eru að minnsta kosti tvær útilegur staðfestar í sumar; ættarmót hjá systkinum mömmu helgina 21.-22. júní og helgina 19.-20. júlí er ættarmót í föðurætt Helenu.

Erum byrjuð á verkefnalista sumarsins er viðkemur húsinu og lóðinni.
- Búin að mosatæta en bíðum eftir rigningu til að bera á grasið.
- Pallurinn olíuborinn í gær og í þessum skrifuðu orðum er Helena að bera á gluggana.

Það sem á eftir að gera hins vegar, er:
- Bera á húsið
- Bera á hurðar
- Bera á vindskeiðar
- Bera á skjólveggi á pallinum
- Bera á sandkassann
- Bera áburð á gras
- Vonandi að smíða skjólbörð á milli innkeyrslunnar og trábeðsins, mölin skolast alltaf í moldina
- Loka pallinum að neðanverðu, negla þar 21×95 planka

Ansi mikill burður þarna á listanum ;o)

Nú er bara að láta hendur standa fram úr ermum og vona veðrið verði hagstætt – ekki miklar líkur á að það standist.

Þegar ég keyrði framhjá Orkunni við miklubraut í gærmorgun stóð lítraverð af díselolíu í 170,1 ISK.

Nú, einum sólarhring síðar, er hann kominn í 175,1 – EITTHUNDRAÐSJÖTÍUOGFIMMKOMMAEIN!

Lítraverð á eldsneyti er orðið svo hátt að fimm króna hækkun er bara pínöts.
Bensínlítrinn hækkaði hins vegar BARA um einhverjar þrjár krónur.

Tókum fellihýsið út á mánudaginn var og opnuðum það smástund til viðrunar í gær.
Hins vegar veit ég ekki hvort ég eigi eftir að tíma því að draga það í sumar á jeppanum.

Vinnustaður minn, Thorvaldssensstræti 4, er beint á ská við alþingishúsið.

Nú flauta atvinnubílstjórar, sjá mbl.is, eins og enginn væri morgundagurinn og það er nánast ólíft vegna hávaða hérna á 5. hæðinni.
Ekki bætir úr skák að það er heitt í dag þannig það kemur ekki til greina að loka gluggum.

Crap.