Þetta var sko viðburðarrík helgi hjá okkur fjölskyldunni. Á föstudaginn hélt Eva Þórey afmælisveislu fyrir vini sína það var heldur betur fjör. Á laugardaginn trúlofuðu Ragna og Beggi sig ásamt því að láta skíra litla prinsinn þeirra og fékk hann nafnið Arnór Daði, fallegt nafn og fer honum svakalega vel. Á sunnudeginum héldum við afmælisveislu fyrir fjölskylduna sem telur um 40 mannst þannig að það er ekki hægt að segja annað en að um stórveislu hafi verið að ræða. Eva Þórey fékk fullt af gjöfum og var alveg í skýjunum alla helgina.
Á sunnudagskvöldið fórum við á Eyrarbakka að kveðja Heiðrúnu systur og Söru og Sylvíu dætur hennar en þær voru að fara heim til sín til Ítalíu. Það er alltaf jafn erfitt að kveðja þær því við sjáum þær svo sjaldan. Eva Þórey vissi ekkert hvernig hún átti að vera og kvaddi þær örugglega 10 sinnum. Svo þegar við vorum komin heim sagði hún að hún væri hálf sorgmædd það hefði verið svo sorglegt að kveðja þær, það kom næstum því tár sagði hún.
Annars er það að frétta að Eva Þórey er auðvitað byrjuð í skólanum og líkar alveg svakalega vel. Ásdís Karen er byrjuð í leikskóla og gengur það mjög vel. Hún er svolitið lítil í sér yfir daginn en ekkert til að hafa áhyggjur af. Við höfum báðar mjög gott af þessu þar sem við erum alltof háðar hvor annari. Hún þarf bara að venjast því að vera annarsstaðar en hjá mömmu sinni. Hún hefur ekki verið mikið í pössun nema hjá ömmu sinni hér í Höfninni og henni líkaði það auðvitað alltaf vel.
Þar sem stelpurnar eru byrjaðar í skóla og leikskóla er húsmóðirin á heimilinu orðin ein heima og er það ekkert smá skrítið. Ég byrja í skólanum í næstu viku og þá verður nóg að gera hjá mér. Svo er aldrei að vita nema einhver vilji ráða mig í vinnu með skólanum svo ég eigi ekki eftir að drepast úr leiðindum hér heima (ekki það að það sé lítið að gera á þessu heimili heldur vantar félagsskapinn).
Endilega verið svo dugleg að kvitta því það er svo gaman að sjá að einhver sé að fylgjast með.
Kveðja, Helena
Nýlegar athugasemdir