rokkið blessi heimilið

Það er búið að vera svo gott veður undanfarið að Eva Þórey sést varla inni. Hún notar hvert tækifæri til að komast út sem er bara besta mál, enda er hún uppgefin á kvöldin og sofnar alveg um leið og hún fer upp í rúm.

Í dag þann 5. maí varð hún litla frænka hún Bryndís Eva 1 árs. Vonum ekkert heitar en að þú hafir átt góðan dag elsku Bryndís Eva okkar og hafi liðið vel. Bebba átti svo afmæli þann 3. maí. Til hamingju með afmælin mæðgur. Við hugsum stöðugt til ykkar.

Um síðustu helgi skruppum við til Keflavíkur í heimsókn. Bjarki bróðir var nýbúinn að fá trambolín og var það mikið notað þennan daginn. Eva Þórey og Aron Elvar frændi hennar sáust ekkert inni því það var svo gaman að hoppa á tramboíninu. Nú bíður Eva Þórey eftir því að afi Jói verði í landi í 2 daga í röð svo hún fái að fara til þeirra og gista.

Ásdís Karen er farin að babla meira og meira. Hún er loksins farin að segja mamma oftar en til hátíðarbrigða en hún hefur verið ansi sparsöm á þetta. Svo er það svo fyndið þegar fólk er að borða í kringum hana eða þegar hún sér mat þá rekur hún út úr sér tunguna og segir nammnammnamm, hún rekur tunguna langt út við hvert namm.

Eva Þórey er í algjöru uppáhaldi hjá henni enda eltir hún stóru systur hvert sem hún fer og hlær að nánast öllu sem hún gerir. Eva Þórey er líka svakalega dugleg við að fylgjast með henni og passa hana, stundum einum of

Ég heyrði Evu Þórey syngja um daginn “og þá var kalt í höllinni höllinni höllinni og þá var kalt í höllinni, höllinni”.

Endilega fylgist vel með á næstu dögum því ég er að spá í að setja inn stórfrétt.

-Helena

Við erum ekki alveg að standa okkur í skrifum hér enda allir eflaust hættir að fylgjast með.
Við erum búin að hafa það fínt um páskana fyrir utan ælupest sem við Eva Þórey nældum okkur í og svo fékk Ásdís Karen smá hitavellu en ekkert til að hafa áhyggjur af.

Við fórum í afmæli á laugardaginn en hún Kristjana Eir litla frænka okkar varð 1 árs þann 14. apríl.  Annars erum við lítið búin að gera nema að slappa af eða þannig…..kannski ekki mikið hægt að slappa af núna þar sem Ásdís Karen er farin að standa alls staðar upp og fikta.
Við erum reyndar búin að fara daglega á Eyrarbakka þar sem Heiðrún, Sara og Sylvía eru í heimsókn yfir páskana.

Ásdís Karen ákvað í gær að nú væri tími til komin að byrja að skríða. Hún hitti frænku sína hana Kristjönu Eir í síðustu viku og var svo fúl að geta ekki skriðið á eftir henni þannig að hún ákvað að fara að reyna.  Hún byrjaði um helgina að reyna en hætti yfirleitt við þegar hún var búin að taka eitt skriðskref en í gær tók hún bara nokkur skref og var ekkert smá ánægð að komast þangað sem hún ætlaði sér.

Eva Þórey er búin að vera lasin síðan á föstudaginn en hún er öll að koma til enda hitalaus í dag og fer væntanlega í leikskólann á morgun.

Við fórum í skírn sunnudaginn 5. mars en litla þeirra Gógóar og Kjartans var þá skírð. Hún var skírð Edda í höfuðið á móðurömmu sinni. Til hamingju með þetta fallega nafn.

Þessi mánuður er mikill afmælismánuður hjá fjölskyldunni. Heiðrún systir átti afmæli þann 5. mars, ég sjálf þann 8. mars, Edda þann 13. mars og svo er Heiða systir þann 20. mars…….til hamingju með afmælið!!!

Þessar tennur hjá henni Ásdísi Karen ætla sko að láta bíða eftir sér. Við erum alltaf segja að þær séu að koma en svo líða nokkrar vikur og ekkert gerist. Nema á mánudaginn þá tók ég eftir einhverju hvítu við hliðina á framtönnunum niðri og haldið ekki að þar sé komin tönn! Við vorum að fylgjast svo mikið með framtönnunum uppi að við gleymdum að kíkja hvort það væri eitthvað að gerast í neðri góm.

Það gengur alveg svakalega vel með Ásdísi Karen hjá ömmu sinni. Hún er oftast lítil í sér fyrst á morgnanna og svo er hún bara góð eða þangað til ég kem að sækja hana þá kemur smá skeifa og svo passar hún vel upp á mig eftir það.

Ásdís Karen stóð upp í rúminu sínu um helgina og var ekkert smá montin. En hún ætlar greinilega ekkert að flýta sér að byrja að skríða. Hún verður 9 mánaða í næstu viku en á þessum aldri var hún Eva Þórey orðin algjör skæruliði og farin að rífa og tæta út um allt enda farin að skríða 7 mánaða. Annars er þetta bara gott svona, maður veit alltaf hvar hún er stödd hverju sinni því hún kemst ekki langt frá manni.

Eva Þórey fór í Línu Langsokkbúningi á öskudaginn og var alveg svakalega ánægð með það. Henni fannst þó mest spennandi að láta mála freknur á sig. Það gengur orðið miklu betur að vekja hana á morgnanna eftir að systir hennar er farin að vakna á sama tíma, sem betur fer. Hún er nefnilega yfirleitt svakalega morgunfúl en núna vaknar hún alveg um leið og við köllum á hana og bara þokkalega hress.

Það er mikið um veikindi í kringum okkur núna en Ragna Kristín systir fékk svo mikla berkjubólgu að það þurfti að leggja hana inn á spítala. En hún er öll að koma til og fékk hún að koma heim í dag. Aron og Kristjana eru búin að vera lasin og svo er Bryndís Eva komin með RS vírusinn. Vonum að þau fari nú öll að ná sér.

Á sunnudaginn næstkomandi förum við í skírn til Grindavíkur því lillan þeirra Gógóar og Kjartans fær loksins nafn.

Ása, Þóra og Palli áttu afmæli þann 1. mars og óskum við þeim til hamingju með það.

Og síðast en ekki síst, nýjar myndir í albúmi.

- Helena

Ásdís Karen ætlar aldeilis að taka þessa tanntöku með trompi 4 komnar á stuttum tíma og svo eru 2 í viðbót alveg að fara að gægjast í gegn. Hún er búin að vera mjög pirruð í gómnum síðustu daga og er alltaf að vakna á næturnar. Er samt algjör engill núna að leika sér á gólfinu með toppinn nánast ofan í augu…..er það ekki hvort eð er í tísku. Eyrún og Emma Hrönn ætla að koma í næstu viku og klippa hana. Það verður þriðja skiptið sem hún er klippt aðeins 8 mánaða.

Kíktum á Bryndísi Evu frænku á Barnaspítalann á laugardaginn. Það er alveg ótrúlegt hvað hún er dugleg. Var meira að segja farin að kíkja út um annað augað þennan daginn en kíkti nú samt ekki á okkur í þetta skipti heldur blikkaði hún mig í staðinn. Það er ekki að sjá á henni að hún hafi sofið í 2 mánuði heldur eins og hún sofi bara vært og sé bara alveg að fara að vakna. Svo geyspaði hún þvílíkt á meðan við vorum hjá þeim, ekkert smá krúttlegt.

Hún fór að vísu að krampa á sunnudaginn en vonandi fara réttu lyfin að finnast til að koma í veg fyrir þessa krampa og svo hún fari að vakna. Hún er alveg ótrúlega sterk og kemst yfir þetta.

Elsku Hjörleifur Már, Bergþóra og Bryndís Eva við hugsum stöðugt til ykkar.

Við skelltum loksins inn nýjum myndum enda kominn tími til.

-Helena