) )
Við erum ekki alveg að standa okkur hér en það er kominn rúmur mánuður síðan við skrifuðum eitthvað síðast.
Jón Óskar fór til LA og var það alveg svakalega fín vinnuferð en auðvitað var eitthvað verslað í leiðinni og örlítið skoðað.
Eva Þórey er alltaf á leikskólanum og gengur alveg svakalega vel. Var reyndar aðeins heima í síðustu viku því hún hóstaði svo mikið en það kom svo í ljós að kinnholurnar voru stíflaðar en hún er öll að hressast.
Ásdís Karen dafnar vel og er farin að taka upp á ýmsu. Hún er orðin svo forvitin og fylgist vel með öllu sem er að gerast í kringum hana. Ef hún er í fanginu á manni og maður er með eitthvað þá er hún alveg æst í að ná því af manni. Svo um daginn tók hún upp á því að puðra og er að því allan liðlangan daginn þannig að maður er alltaf að skipta um föt á henni. Það styttist líka í að hún fari að snúa sér á magann en það vantar herslumuninn.
Við kíktum aðeins í Keflavík um síðustu helgi en Freyr og Bjarki heldu upp á afmælin sín en Freyr var að ná þeim merka áfanga að verða tvítugur.
Það er mikið af afmælum í kringum okkur á þessum tíma en Sara Margrét átti afmæli þann 1. okt. og Gillí á afmæli í dag og svo á Elva afmæli á morgun og Eiður Már þann 17. Til hamingju með afmælin öll.
Veiga og Ómi (tengdó) eru loksins flutt og húsið alveg svakalega fínt og verður en betra þegar eldhúsinnréttingin er komin upp.
Ásdís Karen vaknaði í morgun með hita. Hún er með mikið kvef og hósta. Þetta kvef hennar ætlar ekki að taka enda. Vonum samt að hún verði fljót að ná sér upp úr þessu.
En segjum þetta gott að sinni.
Endilega kíkið á myndirnar og skrifið í gestabókina.
Helena
…var ljúf. Á föstudagskvöldið komu Heiða, Egill, Aron Elvar og Kristjana Eir og Hjörleifur, Bergþóra og Bryndís Eva til okkar í Básahraunið og við grilluðum öll saman. Það var lengi búið að vera í deiglunni að hittast og grilla en eins og oft vill verða þá dróst þetta á langinn, fólk er svo upptekið yfir sumarið. Heiða og Egill buðu matinn enda átti Egill afmæli þann 22. ágúst og fannst þetta tilvalið tækifæri á að halda litla afmælisveislu – takk fyrir okkur!
Fjölskyldan tók sér göngutúr í gær, sunnudag, enda var veðrið með eindæmum gott um helgina. Rölt var úr Básahrauninu á Egilsbrautina og heim aftur með viðkomu á Setberginu hjá Gesti og Dai. Ásdís Karen svaf allan tímann og gott betur; svaf rétt rúma 4 tíma samtals enda þykir undursamlegt að sofa í tæru og súrefnisríku sveitaloftinu.
Heiðrún, Sara og Sylvía fóru aftur til Ítalíu þriðjudaginn 30. ágúst. Það er heldur betur sjónarsviptir að missa þær eftir eins og hálfs mánaðar dvöl á Íslandi, við vorum orðin vön að hafa þær í kringum okkur. Meiri missirinn var á Þykkvaflötinni hjá Snjólaugu og Kalla, þar sem allt datt í dúnalogn þegar þær stöllur fóru…
Það var planað hjá mömmu og pabba að flytja 1. okt en flutningunum hefur nú verið flýtt um amk eina viku. Seljandinn er að fara erlendis í vinnu og þarf þess vegna að flytja fyrir 1. okt. Það verður asnalegt að fara ekki lengur á Egilsbrautina, húsið sem ég ólst upp í og þar sem mörg partýin voru haldin.
Það styttist óðum í að ég fari til L.A., 5 dagar í dag og ekki laust við það séu komin fiðrildi í magann P Þetta er þó bara ein vika sem verður eflaust fljót að líða, það er nú ekki á hverjum degi sem maður fær að fara til Los Angeles… Frétti um daginn að það er slatti af fólki (já, tölvunördar eru líka fólk!!) sem fer á ráðstefnuna á sama flugplani og ég, sem er mjög gott, betra að vita af öðrum sem stefna á sama áfangastað og ég.
- jón óskar
Heimasætan á bænum á afmæli í dag. Eva Þórey (stóra systir) er loksins orðin fjögurra ára. Hún var vakin með kossum og knúsum og brosti sínu blíðasta í gegnum stírurnar meðan við foreldrarnir sungum fyrir hana afmælissönginn.
Morgunmaturinn hjá þessari ungu dömu var kornflex með fjörmjólk og lítil afmæliskaka með einu kerti í eftirrétt.
Á mánudaginn byrjaði Eva Þórey í leikskólanum hér í Þorlákshöfn, Bergheimum, og hefur verið í aðlögun í vikunni sem hefur gengið afar vel. Það var því við hæfi að hún færi með afmælisköku í leikskólann í morgun. Hún heimtaði gómsæta Barbí köku svo að við Helena máttum til með að töfra fram eina slíka með forlátu kökuformi og aðstoð Veigu ömmu.
Það var svo þreytt en ánægð stelpa sem kom heim af leikskólanum með tóman kökudisk og kórónu í tilefni dagsins.
Á laugardaginn verður síðan blásið til afmælisveislu þar sem þessum stórmerka áfanga verður fagnað við hæfi.
Annað ekki síður fréttnæmt er að Ásdís Karen fékk sína fyrstu hárklippingu í dag. Heiðrún, Sara og Sylvía ásamt Snjólaugu ömmu komu í heimsókn og var Heiðrún svo elskuleg að klippa þá stystu. Ásdís Karen stóð sig eins og hetja í klippingunni, spjallaði og brosti allan tímann.
Og síðast, en ALLS ekki síst; Ragna Kristín á líka afmæli í dag og er hún loksins orðin tuttugu vetra gömul. Til hamingju með daginn elsku Ragna Kristín!
Sæl öll. Langt liðið frá síðustu skrifum.
Það hefur heilmikið gerst hjá litlu fjölskyldunni síðustu daga og vikur. Um verzlunarmannahelgina flökkuðum við á milli grillveislna og skemmtum okkur heilmikið meðal fjölskyldu og vina. Dagana 4. – 7. ágúst voru haldnir hér í Þorlákshöfn Hafnardagar og er þetta um 2-3 daga dagskrá sem byrjar á fimmtudagskveldi og endar á sunnudegi.
Við Eva Þórey tókum þátt í dorgveiðikeppni á laugardagsmorginum og er skemmst frá að segja að kappið hafi verið meira í pabbanum en dótturinni. Afraksturinn varð forkunnarfagur verðlaunagripur sem Evu Þórey hlotnaðist, bronsverðlaun fyrir mesta aflann ).
Fjölskyldufaðirinn er enn í fæðingarorlofi en þó bara 50% vinnu sem kom sér vel í nýliðinni viku. Yngsti fjölskyldumeðlimurinn varð óvær og fékk hita á þriðjudagskvöld, einungis rétt 2ja mánaða. Okkur var ráðlagt að fara með hana á Barnaspítala Hringsins, sem við gerðum. Þetta voru 3 dagar í röð sem við fórum þrjú en Eva Þórey var undir verndarvæng ömmu Veigu og síðan Eyrarbakka-gengisins á meðan. Sem betur fer amaði ekkert alvarlegt að Ádísis Karen smávægileg pest sem stúlkan nældi sér í. Hins vegar var ferlið afar óþægilegt, bæði fyrir foreldra og sjúkling. Ásdís Karen þurfti að gangast undir rannsóknir og próf svo hægt væri að útiloka alvarleg veikindi, eins og heilahimnubólgu o.s.frv. Við erum afar fegin því að þessu sé lokið því það stingur í hjartað að sjá þetta litla grey þola svo margt.
Vikan framundan er eiginlegt “sumarleyfi” fjölskyldunnar. Við vorum búin að panta sumarbústað (eða Veiga reddaði okkur eiginlega) en vegna veikinda Ásdísar Karenar ákváðum við að skynsamlegast væri að bíða með að fara í bústaðinn fyrr en á mánudag. Þess vegna var ákveðið að Veiga og Ómi færu uppeftir á föstudag og eyddu helginni þar. Eva Þórey tók forskot á sæluna og fékk að fara með Gesti, Dai, og Gillí í gær og eftir því sem fregnir herma er hún afar upptekin við að fara í pottinn og máta föt (kemur á óvart!).
Framundan er svo leikskóli hjá Evu Þórey en hún byrjar þar eftir viku. Það var svo að koma í ljós í vikunni að ég er að fara til Bandaríkjanna 10. september á Microsoft ráðstefnu fyrir forritara. Herlegheitin verða í Los Angeles þannig að þetta verður laaaangt flug en ljósi punkturinn er að hótelið sem ég mun gista á er í hjarta Hollívúdd, je beibí!
e.s.: Nýjar myndir í myndasafni!
Skírnin gekk svakalega vel enda svaf hún Ásdís Karen þetta allt af sér. Séra Úlfar kom hingað heim og skírði og var það alveg rosalega þægilegt. Gott vera með allt á einum stað, athöfn og veislu.
Um helgina fór Eva Þórey í útilegu í Aratungu með ömmu Veigu og afa Óma. Þau voru náttúrulega svakalega heppin með veður enda sólbrennd eftir ferðina. Eva Þórey skemmti sér vel með þeim Rebekku, Önnu Maríu og Gillí í sólinni. Á laugardeginum fórum þau öll í sund saman og um kvöldið var kveiktur varðeldur og var víst svaka stuð. Eva Þórey var víst ekkert kát með að fara heim eftir útileguna, hún vildi bara vera lengur.
Ásdís Karen heldur áfram að stækka og þyngjast. Hún var í 6 vikna skoðun í síðustu viku og var þá orðin um 5200 gr. og 57,5 cm svo hún er heldur betur að stækka.
Við vorum loksins að setja inn myndirnar úr skírninni!!
Endilega verið ófeimin við að skrifa í gestabókina því það er svo gaman að sjá hverjir eru að fylgjast með.
Nýlegar athugasemdir