Færslusafn 2005

4 dagar til jóla

20.12.2005 17:53 | Jón Óskar | dagbók

Enn ein jólin sem líta út fyrir að verða rauð. Mikið þætti mér gaman að það yrði nú snjór á aðfangadag; mér (eins og öðrum) þætti ekkert jólalegra en að snjó kyngdi niður, hlussusnjókorn takk fyrir.

Ætla samt að setja skilyrði: 
  1. Vind má ekki hreyfa, 2 metrar á sekúndu er algert hámark.
  2. Snjórinn verður að vera hæfilegur, 10 cm jafnfallin snjór er prýðilegt magn.
  3. Það má ekki byrja að snjóa fyrr en á aðfangadagsmorgun.
  4. Að kveldi annars dags jóla, þann 26. desember, má fara rigna – hellirigna.
  5. Að morgni þess 27. desember verða allar götur/allir vegir að vera auðir og greiðfærir.

Er til of mikils mælst?

Eva Þórey hefur verið eins og engill síðan jólasveinarnir fóru að tínast til byggða, einn af öðrum. Reyndar kraumaði óþekktarpúkinn í henni einn daginn og viti menn, hún fékk bréf frá jólasveininum um nóttina. Innihald bréfsins verður ekki tíundað hér en í megin atriðum var brýnt fyrir henni að óþekk börn fá karteflu (kartafla er skrifað með þessum hætti hér af því mér finnst það fyndið) í skóinn og að jólasveinarnir eru ALLTAF að fylgjast með ;o)

Veikindagrýlan er enn á ferðinni og ákvað af sinni einlægu gæsku að koma við hjá okkur. Eva Þórey byrjaði að kvarta um í hálsinum á sunnudag og á mánudagskveld var sú stutta komin með hita. Það virðist einhvern alltaf koma upp veikindi í fjölskyldunni yfir jólahátíðina, heppin.

Verkefninu “Jólagjafir 2005″ fer senn að ljúka, aðeins fáir en léttir verkþættir eftir. Húsið orðið vel skreytt, bæði innan sem utan (sjá eldri færslu með mynd) og jólaandinn sígur hægt en örugglega yfir okkur. Við hlökkum mikið til að halda jólin, því nú í fyrsta skipti verðum við ekki í foreldrahúsum. Litla fjölskyldan heldur nú sín eigin jól og verður það gríðarlegur munur að losna við allt umstang sem hefur einkennt undanfarin jól.
 
Ef vér ritum ekki meira fyrir jól óskum vér yður, lesandi góður, gleðilegra jóla!
 
E.S.: Fyrir áhugasama er hér veðurspáin fyrir helgina:
 
Á Þorláksmessu: V-læg átt, yfirleitt fremur hæg. Slydduél S-lands en slydda eða snjómugga N-lands fram eftir degi. Hiti í ringum frostmark.
Á aðfangadag, jóladag og annan jóladag: S-læg átt og nokkuð hvasst V-lands en annars hægari. Væta sunnan- og V-lands á ðfangadag og jóladag en rigning V-lands annan í jólum, annars úrkomulítið. Fremur hlýtt í veðri.
Spá gerð 20.12.2005 kl. 08:54
6 athugasemdir

Jólahús

03.12.2005 19:36 | Jón Óskar | myndir

 
Svona leit Básahraun 28 út að kveldi þess 3. desember kl. 19:08.
 
Isn´t it pretty?
2 athugasemdir

Jólaklippingin

02.12.2005 10:15 | Jón Óskar | fjölskyldan
Ásdís Karen fékk jólaklippinguna sína í gær. Eyrún og Emma Hrönn voru svo elskulegar að kíkja í heimsókn til okkar og skærin voru meðferðis. Satt best að segja þá var kominn tími á að skvísan yrði klippt, hárið var farið að nálgast augun ískyggilega!
 

 
Hún (Ásdís Karen) er ákveðin lítil dama. Ef hana langar í eitthvað teygir hún sig eftir því og stundum fylgja stunur sem leggja enn meiri áherslu á að hana vanti eitthvað sárlega! Máli okkar til stuðnings leggjum við fram sönnunargagn 1A:

 
Amma Veiga og afi Ómi komu frá útlöndum á aðfararnótt mánudagsins; þau fóru til Saint Johns á fimmtudagsmorgun í síðustu viku og vitanlega var heilmikið verslað. Óhætt er að fullyrða að heimasæturnar í Básahrauninu fara síður en svo í jólaköttinn!
2 athugasemdir

Senn koma jólin

01.12.2005 09:36 | Jón Óskar | dagbók
Gleðilegan Fullveldisdag!
 
Enn styttist í jólin og enn fjölgar jólaskrautinu í Básahrauninu. Nú er búið að skreyta húsið að utanverðu, 80 ljósa sería sett á þakskeggið, 120 ljósa mini sería sett á skjólveggina og fallegur jólakrans prýðir framhliðina.
 
Jólalögunum fjölgar að sama skapi á “playlistanum” og nú er mál að fara huga að jólagjöfum. Á hverju ári gerir maður sömu mistökin, jólagjöfum frestað þangað til á síðustu stundu svo hægt sé að stressa sig aðeins meira yfir þessu ferli.
 
Ómar Páll litli bróðir hélt upp á 20 ára afmælið sitt sl. laugardag og var það vel. Hann fékk einkanúmerið “KÚTUR” að gjöf frá okkur bræðrunum auk vina. Svipurinn sem kom á dýrið þegar hann sá hvað var í pakkanum var óborganlegur – verst að enginn skuli hafa haft rænu á að taka þetta upp á vídjó.
 
Við Eva Þórey fórum í Selfossbíó á laugardaginn að sjá “Litla Kjúlla” (Chicken Little). Þetta er hin prýðilegasta mynd sem vel er hægt að gleðjast og klökkna yfir. Tvisvar sinnum var tosað í ermina hjá mér af Evu Þórey þar sem hún vatnaði músum yfir sorglegum atriðum; “Pabbi, þetta er bara svo rosalega sorgleg mynd!”.
 
Ásdís Karen fór í 5 mánaða skoðun í síðustu viku (2 vikum of seint) og er hún orðin 8 kg og 69,5 cm. Hún fékk ekki sprautu í þetta sinn útaf þessu endalausa kvefi hennar en fær hana vonandi sem fyrst þar sem hún er nú að verða 6 mánaða.
 
Eftirlætis jólalagið mitt er “Baby Please Come Home” með U2. Hvað er uppáhaldsjólalag yðar? Skrifið vinsamlega í ummælin.
 
- jón óskar
4 athugasemdir

R og veikindi

21.11.2005 11:26 | Jón Óskar | fjölskyldan
Það lítur út fyrir að “eððið” sé á undanhaldi í málfari heimasætunnar. Síðastliðinn laugardag tók hún nefnilega upp á því að segja “ERRRRRRR”. Á meðan nýjabrumið er að fara af þessari ánægjulegu nýjung hennar, er sérstök áhersla lögð á err-in í orðum. Vinsælt er að æfa sig á nafni frænku sinnar: Rögnu Kristínu og verð ég að segja (og um leið að springa úr stolti) að æfingarnar sem ég hef lagt fyrir hana séu loks að skila árangri!
 
“Þú verður að láta tunguna hristast fyrir aftan tennurnar, ekki bíta í hana: ERRRRRR….”
 
Ásdís Karen hefur orðið að lúta í lægra haldi fyrir veikindapúkanum, á laugardag fylltist hún af kvefi og í kjölfarið mældist hún með hita greyið. Þrátt fyrir þetta er hún vígreif og brosir sínu blíðasta, lætur ekki bugast af smá pest. Verra er að hún átti að fara í 5 mánaða skoðun/sprautu í vikunni.
 
Enn styttist í jólin og í gær var gramsað í geymslunni eftir kössunum sem geyma jólaskrautið. Tekin var general prufa á seríu-skreytingar og tveir gluggar skreyttir af kostgæfni. Vitaskuld var svindlað örlítið í leiðinni og 2-3 jólalög spiluð úr tölvunni - þið segið engum frá! Næstu helgi er svo planað að skreyta meira, henda jafnvel seríum á pallinn og húsið því næstkomandi sunnudag er jú fyrsti í aðventu (jafnvel maður spili 4-5 jólalög…).
 
 
Grétar Ingi á afmæli dag:
Innilega til hamingju með daginn litli strákur!
 
 
- jón óskar
 
ps. Liverpool vann 3-0 um helgina.
3 athugasemdir

Nýjar myndir – nýjar myndir

16.11.2005 18:21 | Jón Óskar | dagbók
Ég endurtek, NÝJAR MYNDIR!
 
Enda var mál til komið að henda inn myndum á þetta blessaða albúm okkar.

 
Ragna Kristín er að koma heim til íslands á morgun eftir 2 mánaða útlegð í Liverpool borg. Reyndar lendir hún seint þannig við hittum hana ekki fyrr en á föstudag. Vertu velkomin heim Ragna Kristín, ef þú finnur skrýtna lykt í herberginu þínu er kæfan sem ég geymi undir rúminu þínu sennilega farin að skemmast. Dónt vörrí, ég sæki hana á laugardag – sunnudag.
 
kv.
jón óskar
2 athugasemdir

Afmælismánuðurinn mikli

14.11.2005 10:38 | Jón Óskar | fjölskyldan
Ég var að taka saman í lítinn MS Access gagnagrunn afmælisdaga í fjölskyldunni, svona til að eiga yfirlit yfir þetta á einum stað. Dreifingin er nokkuð góð á mánuði ársins en mars og nóvember verma efsta sætið saman.
 
Topp listinn
  1. mars og nóvember (7)
  2. október (6)
  3. apríl (4)
  4. janúar, maí og ágúst (3)
  5. júní og júlí (2)
  6. febrúar, september og desember (1)
Fyrir utan undirritaðann eiga 6 manns afmæli í nóvember og er þeim hér með óskað innilega til hamingju með afmælið (hvort sem það er liðið eða á næstunni):
  • Kjartan – 6. nóvember
  • Kolla – 10. nóvember
  • Afi Kalli – 12. nóvember
  • Afi Jói – 20. nóvember
  • Grétar Ingi – 21. nóvember
  • Ómar Páll – 26. nóvember
Við lögðum land undir fjögur hjól á laugardaginn og rúntuðum til Keflavíkur. Reykjanesbrautin var tekin á 100 km/h með krúskontrólinu sem ég fæ ekki nóg af, meira krús, meira krús. Litla fjölskyldan að Heiðarbóli, Hjörleifur, Bebba og Bryndís Eva tóku á móti okkur með virktum og Sóley leit inn en því miður var Jói enn á sjó þannig við misstum af honum. Það er magnað hversu tíminn flýgur þegar heimsóknir eru iðkaðar því áður en við vissum af var tími til kominn að halda heim á leið og okkur fannst við vera nýkomin.
 
Helgin var að öðru leyti tíðindalítil. Við Eva Þórey hjálpuðum til í Mánanum á föstudagskveld, á laugardagskvöldið gerðum við tilraun til að horfa á myndina Surviving Christmas með Ben Affleck í aðalhlutverki. Ég hef nú aldrei haft mikið álit á Bennanum og ekki jókst það við að horfa á þessa slöku ræmu (eða þessar 40 mínútur sem við horfðum á). 40 mínútur af lífi okkar og 500 krónur horfnar… forever. Í bríaríi rambaði ég á Police Academy á Skjánum og var horft á hana, enda klassík þar á ferð.
 
Sunnudagsrúnturinn að þessu sinni var helgaður Bónus í Hveragerði og innkaup fyrir komandi viku gerð af nánast vélrænum hætti: mjólk, grænmeti, brauð, bleyjur og aðrar nauðsynjar tíndar í körfuna á mettíma.
 
Í gærkveldi horfðum við hjónleysin svo á Strákarnir Okkar, fín mynd með óhefluðu málfari, stöku nekt og endi sem kom á óvart, þ.e.a.s. myndin endaði svo snögglega að okkur nánast brá. Hvet alla sem sjá þessa mynd að veita atriðunum á “Raufarhöfn” sérstaka athygli – í ljósi þess að “Raufarhöfn” er í raun Þorlákshöfn (City of Ölfus).
 
bestu kveðjur,
Jón Óskar
2 athugasemdir

Pabbi á afmæli í dag

09.11.2005 13:32 | Helena | fjölskyldan
Til hamingju með afmælið elsku pabbi okkar.
 
Eva Þórey er sko löngu búin að ákveða hvernig köku pabbi sinn á að fá en það er auðvitað Liverpool kaka. Það kemur ekkert annað til greina svo ég verð að reyna töfra eitthvað fram, sjáum til hvernig það gengur.
Kveðja, Helena, Eva Þórey og Ásdís Karen
3 athugasemdir

Bréf til Arons Elvars

05.11.2005 10:00 | Jón Óskar | gullmolar
Svo skrifar heimasætan:
 
“Aron Elvar, ég er á nýjum leikskóla og þú líka, er búin að fá nýjan bíl og líka með pakka. Ásdís Karen fæddist í júní og svo bara…. líka Kristjana Eir fæddist í júní (leiðrétting ritara: Kristjana Eir fæddist í Apríl.).
 
Kveðja,
Þín Eva Þórey”
1 athugasemd

Er einhver að fylgjast með?

31.10.2005 22:59 | Jón Óskar | dagbók
Okkur langar til að gera litla óformlega könnun á því hvort einhver sé að fylgjast með vefnum okkar. Við yrðum AFAR þakklát ef þú kvittaðir í ummælin fyrir þessa færslu þegar þú lest hana!
 
Með fyrirfram þökk,
fjölskyldan Básahrauni 28
10 athugasemdir
Performance Optimization WordPress Plugins by W3 EDGE