rokkið blessi heimilið

Ég ætla að byrja á því að afsaka þessa bilun sem hefur verið á síðunni minni síðustu daga. Pabbi gleymdi alltaf að laga hana og ekki gat ég treyst á mömmu í þessum málum ( ég veit ekki hvað hefði orðið um síðuna mína ef hún hefði farið að reyna að laga hana).

Það hefur ýmislegt gerst síðan ég skrifaði síðast og ber þar helst að nefna að ég er orðin 3 ára gömul og hef því stækkað alveg helling. Á afmælisdaginn þegar ég vaknaði fékk ég pakka frá mömmu og pabba en í honum var barbie bíll. Ég fékk nú ekki langan tíma til að leika með hann því ég þurfti að fara í leikskólann þennan morgun sem var ekkert verra því þar var haldið upp á afmælið mitt og ég fékk afmæliskórónu líka.

Ég hélt svo smá veislu á laugardaginn og komu margir í veisluna. Pabbi bjó til Nemo köku og var hún ekkert smá flott og svo fékk ég alveg fullt af pökkum. Ég var ekki lengi að taka utan af pökkunum og var ég komin úr afmælisfötunum undireins því ég fékk svo flott föt frá ömmu og afa á Eyrarbakka að ég varð að máta þau (ég er nefnilega algjör fatafrík).

Um helgina erum við pabbi að fara í veiðiferð með afa og ömmu í Þorlákshöfn og verðum yfir eina nótt. Mamma er að fara í óvissuferð með konunum í leikskólanum svo hún kemur ekki með okkur.

Bið að heilsa að sinni og endilega skrifið í gestabókina mína
kveðja, Eva Þórey

Nú eru frænkur mínar frá Ítalíu komnar. Við fjölskyldan fórum á Eyrarbakka að hitta þær um helgina. Það var rosa fjör hjá okkur og náðum við strax saman þó við værum ekki búnar að hittast frá því um jólin. Sara talaði strax við okkur íslensku en Sylvía skilur íslensku en talar aðallega ítölsku en ég var nú fljót að redda mér því ég var farin að reyna tala við hana á bull máli (sem ég kallaði ítölsku).

Nú er það bara þessi vika eftir í leikskólanum fyrir sumarfrí og er okkur farið að hlakka mikið til. Pabbi verðu nú samt ekki í fríi með okkur allan tímann en eitthvað samt. Hann var að byrja í nýrri vinnu í dag hjá Nýherja og er því hættur hjá KB banka þar sem honum líkaði ekki þar.

TIL HAMINGJU MEÐ NÝJU VINNUNA PABBI MINN!!

kveðja, Eva Þórey

Jæja, það er búið að vera svo mikið að gera hjá mér undanfarið að ég hef alveg gleymt að skrifa á síðuna mína. Í síðustu viku var haldin sumarhátíð í leikskólanum mínum. Það var margt um að vera, við fórum í skrúðgöngu, grilluðum pylsur og svo voru leigðir tveir hoppukastalar. Mér leist ekkert á að fara í þessa hoppukastala, það var bara nóg að horfa á þá. Síðan á föstudaginn kom Brúðubíllinn til okkar og það var sko gaman.

Eftir leikskóla á föstudaginn brunuðum við svo á Eyrarbakka því pabbi fór að veiða. Það var svo gott veður hjá ömmu og afa að við vorum úti fram eftir kvöldi. Pabbi kom svo seinna um kvöldið heim með 3 fiska sem hann veiddi og einn var alveg risastór en ég var sofnuð þegar hann kom heim svo ég fékk ekki að sjá þá.

Nú er ég farin að bíða eftir frænkum mínum þeim Heiðrúnu, Söru og Sylvíu en þær eru að koma til landsins á morgun frá Ítalíu. Við sáum þær síðast á jólunum svo það verður gaman að hitta þær aftur.

Heyrumst seinna,
Eva Þórey

Í dag fór ég í ferð með nokkrum úr leikskólanum mínum í húsdýragarðinn.

Við fórum í strætó þangað og var það næstum jafn gaman og að vera í húsdýragarðinum. Við skoðuðum öll dýrin og fórum svo í fjölskyldugarðinn og fengum grillaðar pylsur og ís á eftir. Svo fengum við að leika okkur í stóra skipinu og öllum leiktækjunum á eftir. Þetta var mjög skemmtileg ferð og var ég frekar þreytt á eftir, enda sofnaði ég í litla stólnum mínum þegar ég kom heim úr leikskólanum. Jæja best að fara í bað, bless í bili, Eva Þórey

Á laugardaginn var stuð. við fórum til Þorlákshafnar því mamma og pabbi lofuðu ömmu að vinna í Mánanum. Það var tilboð í gangi vegna júróvisjón og amma þurfti á duglegu fólki að halda ;o)

Amma og afi frá Eyrarbakka komu að sækja mig og ég fór með þeim í “litla bílnum” (litli bíllinn er Octavian þeirra, því nú þegar við erum komin á jeppa eru fólksbílar orðnir litlir bílar!).

Ég horfði á keppnina með ömmu og afa svo kom mamma rétt áður en Jónsi steig á svið. Að sjálfsögðu söng ég með laginu og amma var alveg hreint yfir sig hissa að ég gæti sungið svona mikið með! Reyndar á ég tvö uppáhaldslög úr júróvisjón; Heaven með Jónsa og Wild Dance með Ruslana Úkraínukoff (ég kann nebblega að dansa eins og Ruslana!).

Jæja ég læt þetta duga í bili….

kveðja,
Eva Þórey

Á laugardaginn var opið hús í leikskólanum mínum og fórum við pabbi (mamma var að vinna) saman að skoða verkin mín frá nýliðnum vetri.

Á sunnudaginn fórum við fjölskyldan í sunnudagsrúnt til ömmu og afa í Keflavík. Það var svo gaman hjá þeim að ég ætlaði varla að vilja fara heim. Við fórum út á róló með ömmu að róla og vega salt en á meðan var afi að elda dýrindis fiskrétt handa okkur. Við keyrðum svo heim um kvöldið og var ég orðin ansi þreytt þá.

kveðja, Eva Þórey