Færslur í September 2004

Sumarbústaðarferð

19.09.2004 21:24 | Jón Óskar | dagbók

Við fjölskyldan fórum í sumarbústað í Svignaskarði um helgina. Amma og afi í Keflavík, Bjarki frændi og Jóhann Már vinur hans voru komin upp í bústað á undan okkur. Við vorum ekki búin að vera lengi þarna þegar Freyr, Hjörleifur Már og Bergþóra komu.

Ég var svo spennt að fara í heita pottinn að ég gat varla beðið en mamma sagði við mig að ég yrði að bíða fram á laugardag.

Heiða, Egill og Aron komu í heimsókn bæði á föstudagskvöldið og á laugardaginn en þau eiga heima þarna rétt hjá eða á Bifröst.

Þegar ég vaknaði á laugardagsmorguninn þá var það fyrsta sem ég sagði við mömmu “.. má ég núna fara í pottinn” og ég fékk loksins að fara þegar ég var búin að borða morgunmatinn. Ég var í pottinum nær allan laugardaginn að undanskilinni ferð upp á Bifröst þegar við heimsóttum Aron Elvar frænda minn en á meðan fór pabbi og Freyr að veiða.

Það var gaman að heimsækja Aron Elvar á Bifröst. Hann sýndi mér húsið sitt, leikskólann sinn og svo tókum við smá göngutúr um svæðið.

Á laugardagskvöldið grilluðu afi og amma handa okkur læri sem var rosalega gott og svo fórum við í skemmtilega leiki á eftir.

Við fórum svo heim á sunnudaginn og þá ætlaði sko ekki að missa af Hvalfjarðargöngunum því ég svaf víst á leiðinni upp í bústað. Mér fannst þessi göng nú svolítið skrítin en ég var ekkert hrædd í þeim.

TIL HAMINGJU MEÐ AFMÆLIÐ AMMA
Að lokum vil ég svo óska henni Snjólaugu ömmu minni til hamingju með afmælið en hún átti afmæli á föstudaginn þann 17. september
kveðja Eva Þórey

Án athugasemda

Nýtt myndasafn

12.09.2004 22:00 | Jón Óskar | vefurinn

Pabbi minn var að breyta og bæta myndasafnið mitt svo endilega kíkið á það. Svo vorum við líka loksins að setja inn myndir úr Spánarferðinni. Kíkið….kveðja, Eva Þórey

Án athugasemda

Veiðiferð

12.09.2004 21:52 | Jón Óskar | ferðalög

Það var heldur betur stuð um síðustu helgi hjá okkur. Á meðan mamma fór í óvissuferð með Heiðarborg fórum við pabbi austur fyrir fjall í veiði. Amma og afi voru með Volann á leigu og ákváðum við pabbi að kíkja á þau og athuga hvort ekki væri hægt að krækja í fisk á grillið.

Þetta var á laugardegi sem við fórum og um leið og við mættum á svæðið voru veiðistangirnar græjaðar og reynt að gabba fisk til að bíta á. Reyndar var svolítið skemmtilegt að rekast á mömmu í innsveitum suðurlands – þá voru þær á Heiðarborg akkúrat í óvissuferð á sömu slóðum og við pabbi vorum að veiða!!

Enginn fiskur kom á land hjá okkur pabba á laugardeginum en amma og afi fengu 3 fiska. Þrátt fyrir dræma veiði var það afar þreytt stelpa sem fór að sofa í veiðikofanum á laugardagskvöldið.

Sunnudagurinn var tekinn snemma, við vorum mætt út í á rúmlega hálf tíu og var atast í henni eitthvað fram eftir degi. Það var þó um þrjú leytið sem að það beit fiskur á öngulinn minn!! Afi hafði hjálpað mér að kasta út í og hann hjálpaði mér líka við að draga fiskinn að landi. Ég lét líka afa alveg um það að losa fiskinn og handleika, var ekki par hrifinn af þessum spriklandi fiski!

En fyrsti fiskurinn kominn á land og í veiðibækur fjölskyldunnar í mínu nafni og það er víst að þeir verða fleiri í framtíðinni. Ég vona bara að hann pabbi fari að draga mömmu líka með í veiðiferðir, þetta er nefnilega alveg svakalega gaman!!

bless í bili,
Eva Þórey

Án athugasemda

Afmæli

02.09.2004 22:11 | Jón Óskar | fjölskyldan

Ég ætla að byrja á því að afsaka þessa bilun sem hefur verið á síðunni minni síðustu daga. Pabbi gleymdi alltaf að laga hana og ekki gat ég treyst á mömmu í þessum málum ( ég veit ekki hvað hefði orðið um síðuna mína ef hún hefði farið að reyna að laga hana).

Það hefur ýmislegt gerst síðan ég skrifaði síðast og ber þar helst að nefna að ég er orðin 3 ára gömul og hef því stækkað alveg helling. Á afmælisdaginn þegar ég vaknaði fékk ég pakka frá mömmu og pabba en í honum var barbie bíll. Ég fékk nú ekki langan tíma til að leika með hann því ég þurfti að fara í leikskólann þennan morgun sem var ekkert verra því þar var haldið upp á afmælið mitt og ég fékk afmæliskórónu líka.

Ég hélt svo smá veislu á laugardaginn og komu margir í veisluna. Pabbi bjó til Nemo köku og var hún ekkert smá flott og svo fékk ég alveg fullt af pökkum. Ég var ekki lengi að taka utan af pökkunum og var ég komin úr afmælisfötunum undireins því ég fékk svo flott föt frá ömmu og afa á Eyrarbakka að ég varð að máta þau (ég er nefnilega algjör fatafrík).

Um helgina erum við pabbi að fara í veiðiferð með afa og ömmu í Þorlákshöfn og verðum yfir eina nótt. Mamma er að fara í óvissuferð með konunum í leikskólanum svo hún kemur ekki með okkur.

Bið að heilsa að sinni og endilega skrifið í gestabókina mína :)
kveðja, Eva Þórey

Án athugasemda